اليوم وانا رايح المكتب لاقيت بنت حلوة على الطريق تُأشر لسيارة.. وقفت لها وطلعتها قلنا نعمل فيها خير ونوصلها لجولة كالتكس وبالمرة ندردش. سألتها :" فين رايحة؟ قالت بلغة ضاحكة:" الحديدة .. تعرف طريق الحديدة؟ قلت لها :" لا والله ماعرفش طريق الحديدة ولا صنعاء ولا بكذب عليك، طريق الحديدة بعيدة وانا يلا ركبي يشلوني ..ما احبش الكذب ورحم الله امرء عرق قدر (ركبه).. قالت :" جرب يمكن تعرف الطريق..ناس كثيرة يعرفون طريق الحديدة.. قلت لها :" والله شوفي انا ماكذبش واعرف ركبي ،الناس اللي يعرفون طريق الحديدة وصلوا امس الى "السويد" اما انا وحالاتي يلا نعرف طريق "كالتكس" .. قالت :" اخص عليك بعز شبابك بس طلعت أي كلام.. قلت لها :" هدرة هدرة لاتكوني تصدقي الكلام .. خليك مع الفعل بس، الفعل غير الكلام . نزلت وطبقت "الباب".. نزلت انا الزجاج حق السيارة وناديت عليها ... والتفتت وقلت لها :" لاتصدقيش كل اللي يقولك يعرف طريق الحديدة .. ضحكت وضحٍكت وضحكت جولة كالتكس ومرت مدرعة وكانت تضحك وانقلبت..وجزع طقم مليان جثث شباب زي الورد جابوهم من طريق "الحديدة".. #فتحي_بن_لزرق 5ديسمبر2018