اجينا عليها والله سياسة ياجني شله شله ياجني رده رده ابتدينا كلامنا بهدا العنوان وهو كلام كنا نقوله في لعبه قديمه من التراث العدني في مدينة الشيخ عثمان وكل عدني خالص من ابناء الشيخ عثمان وخاصة حوافي الصباغين شكشنA/4شارع قرطبة والأزهر والحمر وحافة القدس واليرموك وكل حوافي الشيخ عثمانA/B/D/C/لما السيلة. ياجني شله شله ياجني رده رده هي عبارة عن كبنه من التراب يعملها الأطفال وعليها عود ويتم البحث فيها عن الشيء الضايع او المفقود ايام العانة والبيستين والشلن ابو اسد. واليوم اجينا عليها اصحاب فوق يلعبوا معنا وبطريقة سياسية سياسة ياجني شله شله ياجني رده رده ...! يعني اصحاب فوق مش عارفين ان حياة الناس ارتبطت بكل مايتعلق من خدمات ومعيشه، الكهرباء والماء، والمواصلات،الخضار، الصيد(الأسماك)اللحوم، المواد الغدائية والكتاب المدرسي الذي ماهلوش في المدارس وموجود بلأسواق وخلوا الطبق مستور قبل ما نطعفر ونسكب الخبر المخبئ كله وحتى الحبه الدواء ارتبطت ارتباط وثيق بأسعار الوقود. وانتم يااصحاب فوق ومعاكم بعض اصحاب تحت ماقدرتو تضبطوا لنا اسعار الوقود ولا قدرتم اوعرفتم تحددو سياسة نقذيه للعملة ولاقدرتوا تضبطوا بنك ولا مناقصات ولاتجار وخاصة مناقصات الوقود والذي خليتوها مثل ياجني شله شله ياجني رده . تاجر واحد جالس يلعب بنا لعب يعني خلاص هدا قدر ولازم نرضى به ومافيش حل تاني؟ يعني العيب في من في التجار او فيكم او كلكم في الهواء سوا شوفو الناس ضاقت وملت من التخبط حقكم وشغل الهوشليه اضبطوا انفسكم وكونوا دولة.. وابحتوا عن الحلول والمعالجات والبدائل المتاحة والممكنه واعلموا ان المواطن قد اضناه واتعبه سوء إدارتكم وعجزكم وعدم قدرتكم على ضبط الأمور وتركها على الغارب وخليتهم الأمر كله بأيادي ناس لاتخاف الله ولا تتقيه ولا ترعاه في هدا المواطن وهدا الوطن إلى متى باتستمر سياسة التهبيش والتخبط وياجني شله شله وياجني رده رده المريسي